அஜீத் பில்லா-2வில் 20வயது இளைஞனாக நடிக்கிறார்

 "மங்காத்தா" படத்தை தொடர்ந்து அஜீத், நடிக்கும் "பில்லா-2" படத்தில் 20வயது இளைஞனாக நடிக்கிறார். இதற்காக தனது ‌எடையை குறைக்கும் வேலையில் இறங்கி இருக்கிறார் அஜீத். கடந்த 2007ம் ஆண்டு விஷ்ணுவர்தன் இயக்கத்தில், அஜீத் நடிப்பில் மாபெரும் வெற்றி பெற்ற படம் "பில்லா". இப்படத்தின் இரண்டாம் பாகமாக பில்லா-2 எடுக்கப்படுகிறது. முதலில் இப்படத்தை விஷ்ணுவர்தன் தான் இயக்குவதாக இருந்தது. ஆனால் திடீரென அவர் விலகிகொள்ள, அவருக்கு பதிலாக சக்ரி டோல்டி டைரக்ஷன் பொறுப்பை ஏற்றார்.

தற்போது அஜீத், வெங்கட்பிரபு இயக்கத்தில் உருவாகி வரும் "மங்காத்தா" படத்தில் நடித்து வருகிறார். அஜீத்தின் 50வது படமான இப்படம் மிகுந்த எதிர்பார்பை ஏற்படுத்தியுள்ளது. "மங்காத்தா" படத்தை ரிலீஸ் செய்யும் முன் "பில்லா-2" படத்திற்கான வேலையில் இறங்கி இருக்கிறார் அஜீத். "மங்காத்தா" படத்தில் நரை முடியுடன் மாறுபட்ட வேடத்தில் நடித்து வரும் அஜீத், பில்லா - 2வில் 20வயது பையனாக நடிக்கிறாராம். இதற்காக தனது உடல் எடையை குறைக்கும் பணியில் மும்முரமாக இறங்கியுள்ளார் அஜீத். மேலும் படத்தில் அஜீத்தை இளைஞனாக காட்ட ஹாலிவுட்டில் இருந்து பிரபல மேக்கப்மேன்களை வரவழைக்க உள்ளனராம். அந்த மேக்கப்மேன் அஜீத்துடன் தங்கி அவருக்கு தேவையான டிப்ஸ்களை கொடுப்பார். கடந்த வாரம் தான் "பில்லா 2" படத்தின் முதல் போட்டோ ஷூட் நடந்தது. "மங்காத்தா" படத்தின் ரிலீஸ்க்கு முன்பே "பில்லா-2" படம் துவங்க இருக்கிறது.